صیہونیوں سے لین دین قوم و مذہبی اقدار بیچنے کے مترادف ہے، آیت اللہ شیخ عیسی قاسم

مناما : بحرین کے بزرگ مذہبی رہنما آیت اللہ شیخ عیسی قاسم نے عوام کو صیہونیوں کے ساتھ ہر طرح کے تجارتی معاملات اور لین دین سے خبردار کیا ہے۔ انہوں نے صیہونیوں کو زمین اور مکان بیچنے سےخبردار کرتے ہوئے اسے مذہب، تاریخ اور ملک کو فروخت کرنے کے مترادف قرار دیا ۔آیت اللہ شیخ عیسی قاسم نے کہا کہ رقم کے بدلے صیہونی نہ صرف بحرینیوں کی زمینوں پر قبضہ کرتے ہیں بلکہ ان کے ضمیر کا بھی قتل کردیتے ہیں۔ بحرین ایک اسلامی ملک ہے لیکن صیہونیوں کے ذریعے آبادی کا تناسب بگاڑنے والے ایجنڈے کے تحت کل یہ ملک صیہونیوں اور مسلمانوں کا ملک ہوگا اور اس کے اگلے مرحلے میں بحرین ایک ایسا صیہونی ملک ہوگا جہاں مسلمانوں کو کچل دیا جائے گا۔آیت اللہ شیخ عیسی قاسم نے کہا کہ صیہونیوں کو زمین بیچنا، صرف مٹی اور پتھر فروخت کرنا نہیں بلکہ صیہونیت کے ہاتھوں قوم، امت اور تمام مذہبی اقدار کو فروخت کرنا ہے۔