Raza Musani 
دمشق: شام کے دارالحکومت دمشق میں یوم عاشور سے ایک روز قبل مزار حضرت سیّدہ زینب سلام اللہ علیہ کے قریب دھماکے میں چھ افراد شہید اور 23 زخمی ہوگئے۔ دمشق کے مضافاتی علاقے سیدہ زینب میں دھماکا مزار حضرت سیّدہ زینب کی جانب جانیوالے راستے پر ہوا۔ دھماکا خیز مواد ٹیکسی کے قریب کھڑی موٹر سائیکل میں نصب کیا گیا تھا۔ دھماکے سے ٹیکسی تباہ ہوگئی۔ وزارت داخلہ نے کہا ہے کہ پولیس اور متعلقہ حکام نے دھماکے کی جگہ پر پہنچ کر لاشوں اور زخمیوں کو اسپتال منتقل کیا۔ مزار کے قریب رواں ہفتے میں دوسرا بم دھماکا تھا۔ منگل کو دھماکہ میں دو افراد زخمی ہوئے تھے۔ یہ دھماکے ایسے وقت کئے گئے ہیں جب عاشورہ محرم کی وجہ سے لاکھوں زائرین دمشق میں موجود ہیں۔ دہشت گردانہ حملے کی فوری طور پر کسی نے ذمہ داری قبول نہیں کی۔لیکن ماضی میں تکفیری دہشت گرد تنظیم داعش ایسے حملوں کی ذمہ داری قبول کرتی رہی ہے۔
