پاکستان اور ایران میں سیاحت کے فروغ کے لئے مشہد کراچی پرواز کا آغاز

کراچی: کراچی اور مشہد کے درمیان براہ راست پرواز کا آغاز ہو گیا۔ ایران کی تابان ایئر لائن کی پہلی پرواز منگل کی رات کراچی کے جناح ایئر پورٹ پر اتری۔
منگل کی رات تابان ایئر لائن کا ایک ایئر بس 320 طیارہ 90 مسافروں کے ساتھ کراچی میں اترا اور واپسی میں اس پرواز سے 103 مسافر مشہد مقدس روانہ ہوئے۔
اس پرواز کی اہم بات یہ تھی کہ سندھ کے گورنر کامران خان ٹیسوری نے اپنے ایران دورے کا آغاز تابان ایئر کی اسی پرواز سے کیا۔ ایران میں وہ مختلف شعبوں میں تعاون بڑھانے کےلئے ایران کے عہدیداران سے مذاکرات کریں گے۔
کراچی سے اسلامی جمہوریہ ایران کے قونصل جنرل حسن نوریان بھی پاکستانی وفد کے ہمراہ ایران آئے ہيں۔
اس سے قبل ایران کی تابان ایئر لائن کی ” مشہد کراچی” پرواز کے آغاز پر منگل کی رات ایک خاص تقریب کا انعقاد کیا گیا جس میں کراچی میں اسلامی جمہوریہ ایران کے قونصل جنرل حسن نوریان اور سندھ کے گورنر کامران ٹیسوری اور دیگر پاکستانی حکام نے شرکت کی۔ یہ تقریب کراچی کے جناح بین الاقوامی ایئرپورٹ میں منعقد ہوئی ۔
تابان ايئر لائن کی یہ پرواز ہفتے میں ایک دن منگل کے روز چلے گی۔