کرم میں جھڑپیں 6 روز سے جاری، جاں بحق افراد کی تعداد 111 ہوگئی

ضلع کرم میں جھڑپیں 6 روز سے جاری ہیں، اس دوران جاں بحق ہونے والے افراد کی تعداد 111 ہو گئی ہے۔ پولیس کے مطابق لوئر کرم میں جھڑپوں سے اب تک 150 افراد زخمی ہو چکے ہیں۔ اس وقت بگن علیزئی، ٹالوکنج، جیلامئے، کنج علیزئی مقبل، خار کلے بلیش خیل کے درمیان شدید لڑائی جاری ہے۔ اسپتال ذرائع کا کہنا ہے کہ ٹالوکنج پر جیلامئے کے طرف سے دوبارہ لشکر کشی کوشش میں 2 افراد زخمی ہوئے ہیں۔ اس سے پہلے گزشتہ شب مختلف علاقوں میں فائرنگ کے واقعات میں 6 افراد زخمی ہوگئے تھے۔
موصولہ اطلاعات کے مطابق خرلاچی و بوڑکی گاؤں پر مبینہ طور پر افغانستان سے تکفیری دہشت گرد داعش نے بھاری ہتھیاروں سے شیعہ سنی پرامن شہریوں پر حملہ کیاہے۔ خارجی دہشتگرد مبینہ طور پر سرحدی باڑ کاٹ کر پاکستان میں داخل ہوئے۔
واضح رہے کہ ضلع کے مختلف مقامات پر فائرنگ کے واقعات کے دوران مجموعی طور 111 افراد جاں بحق اور ڈیڑھ سو سے زیادہ زخمی ہو چکے ہیں۔ اس دوران وہاں موبائل فون اور انٹرنیٹ سروس مکمل طور پر معطل ہے اور تعلیمی ادارے بھی بند ہیں۔ مرکزی شاہراہ اور بازار بھی ضلع بھر میں تاحال بند ہیں۔ ڈپٹی کمشنر جاوید اللہ محسود کے مطابق قیام امن کے لیے مختلف اقدامات جاری ہیں اور گرینڈ امن جرگہ مذاکرات کے لیے مشران سے بات چیت میں سرگرم ہے۔