چین کا پاکستان پر اپنے اداروں اور عملے کےلیے محفوظ ماحول مہیا کرنے پر زور

بیجنگ : چین کے صدر شی جن پنگ نے پاکستان کو حمایت کا یقین دلاتے ہوئے چینی اداروں اور عملے کےلیے محفوظ ماحول مہیا کرنے پرزور دیا ہے۔ بیجنگ میں تیسرے بیلٹ اور روڈ فورم کے دوران پاکستانی نگراں وزیر اعظم انور الحق کاکڑ کے ساتھ ملاقات کے موقع پر صدرشی نے کہا کہ امید کی جاتی ہے کہ پاکستان چینی اداروں اور عملے کی حفاظت یقینی بنائے گا۔ ملاقات میں دونوں رہنماؤں نے اپنی غیر متزلزل پارٹنر شپ پر زور دیتے ہوئے کہا کہ دونوں ممالک اسٹریٹجک کمیونیکیشن اور دوطرفہ تعاون کو مزید مستحکم کریں گے۔ اجلاس کے بعد چینی وزارت خارجہ سے جاری بیان میں کہا گیا ہے کہ ’ شی‘ نے پاکستان کی جانب سے چین کے اہم مفادات کی طویل مدتی اور مضبوط حمایت کو سراہا اور کہا کہ بیجنگ پاکستان کی قومی خودمختاری کے تحفظ ، اس کی آزادی اور علاقائی سالمیت کی حمایت جاری رکھے گا۔