چین 2027 میں تائیوان پر حملہ کرنے کا ارادہ رکھتا ہے، امریکا کا الزام

سنگاپور: امریکی وزیر دفاع پیٹ ہیگستھ نے الزام لگایا ہے کہ چین ایشیا میں طاقت کے توازن کو بگاڑنے کے لیے فوجی طاقت کے استعمال کے لیے تیاری کر رہا ہے۔سنگاپور میں سالانہ سکیورٹی کانفرنس شنگریلا ڈائیلاگ میں خطاب کرتے ہوئے امریکی وزیردفاع نے کہا کہ چین کی طرف سے خطرہ حقیقی ہے اور جلد سامنے آنے والا ہے۔ چین فوجی طاقت استعمال کر کے انڈو پیسفک ریجن میں طاقت کا توازن تبدیل کرنا چاہتا ہے۔ انہوں نے کہا کہ چین 2027 میں تائیوان پر حملہ کرنے کا ارادہ رکھتا ہے جس کے خطے اور دنیا کے لیے تباہ کن نتائج برآمد ہو سکتے ہیں۔ انہوں نے دعویٰ کیا کہ امریکہ جنگ نہیں چاہتا۔ چین پر غلبہ یا گلا گھونٹنے کی کوشش نہیں کرتا لیکن اس بات کو یقینی بنانا چاہتا ہے کہ چین ہم پر یا ہمارے اتحادیوں اور شراکت داروں پر غلبہ حاصل نہ کر سکے۔ انہوں نے ایشیا میں امریکی اتحادیوں اور شراکت داروں سے مطالبہ کیا کہ وہ بڑھتے ہوئے خطرات کے پیش نظر اپنے دفاع کو تیزی سے اپ گریڈ کریں۔