Raza Musani 
تہران : ایران میں کورونا وائرس کے پھیلاؤ کے 20 ماہ بعدپہلی بار دارالحکومت تہران میں مرکزی نماز جمعہ ادا کی گئی جس میں بڑی تعداد میں نمازی شریک ہوئے۔ کورونا وائرس کے پھیلاؤ میں شدت کے بعد مارچ 2020 میں تہران سمیت ایران کے مختلف شہروں میں نماز جمعہ کے اجتماعات کا انعقاد روک دیا گیا تھا۔ تاہم اب نیشنل کورونا کنٹرول ہیڈ کوارٹر نے ملک گیر ویکسی نیشن مہم کی کامیابی کے بعد، تہران میں نماز جمعہ کے انعقاد کی اجازت دے دی ہے۔20 ماہ کے بعد تہران کی مرکزی نماز جمعہ حجتہ الاسلام محمد جواد حاج علی اکبری کی اقتدامیں ادا کی گئی۔ حجتہ الاسلام علی اکبری نے خطبہ جمعہ میں ہفتہ وحدت اور امت کے درمیان اتحاد کی اہمیت پر روشنی ڈالتے ہوئے کہا کہ، امت مسلمہ کے درمیان اتحاد کوئی سطحی معاملہ نہیں بلکہ بنیادی اسٹریٹیجی ہے۔انہوں نے کہا کہ اتحاد کا مطلب مسلمانوں کی صفوں کو منظم کرنا، دلوں کو قریب لانا اور ان کے نظریات میں ہم آہنگی پیدا کرنا ہے۔ اس چیز کو اخوت اور بھائی چارے سے تعبیر کیا گیا ہے.
