غزہ میں وحشیانہ آپریشن، 24 گھنٹوں میں 83 فلسطینی شہید

غزہ: غزہ میں وحشیانہ آپریشن کے دوران صیہونی فوج نے چوبیس گھنٹوں میں تراسی فلسطینی شہید کردئے۔ اکسٹھ فلسطینوں کو صرف غزہ سٹی میں شہید کیا گیا۔
اسرائیلی فوج نے غزہ سٹی میں الشفا ہسپتال کے قریب شہریوں کے ایک گروپ کو اس وقت نشانہ بنایا جب وہ جنوب کی طرف نقل مکانی کررہے تھے اس حملے میں انیس فلسطینی شہید اور درجنوں زخمی ہوگئے۔ جن میں سے بیشتر کی حالت تشویشناک ہے۔ تل الہوا میں رہائشی اپارٹمنٹ پر گولہ باری سے سات شہری شہید اور آٹھ زخمی ہو گئے۔ الصحابہ اسٹریٹ پر ڈرون حملے میں پانچ فلسطینی شہید اور گیارہ زخمی ہوگئے۔
خان یونس۔ بیت حنون اور الزیتون میں بھی شدید حملے کئے گئے جس میں قیمتی جانیں ضائع ہوئیں۔ شدید بمباری اور گولہ باری سے بچنے کیلئے لوگ جنوب کی جانب فرار ہورہے ہیں۔ صیہونی فوج نے غزہ سٹی سے نکلنے کیلئے ایک اور راستہ کھول دیا ہے۔
دو سال سے جاری اسرائیلی بربریت میں شہید فلسطینیوں کی تعداد پینسٹھ ہزار سے تجاوز کرگئی ہے۔