غزہ پر وحشیانہ حملے، اسپتال لاشوں اور زخمیوں سے بھرگئے

غزہ : صیہونی فوج کے وحشیانہ حملوں میں غزہ کے اسپتال لاشوں اور زخمیوں سے بھرگئے۔ صیہونی جنگی طیاروں نے غزہ میں جگہ جگہ بم برسائے۔ جبکہ اسرائیلی کشتیوں نے غزہ کے جنوب میں رفح اور خان یونس شہرکے ساحلوں پر گولہ باری کی ہے۔ اسرائیلی فوج نے خان یونس میں شدید بمباری اور شیلنگ کی ہے۔ صیہونی فوج نے شہریوں کو خان یونس یونس سے انخلا کا حکم دینے کے بعد خان یونس کے شمال میں زمینی کارروائی تیز کردی ہے۔ خان یونس کے اطراف شدید گولہ باری سے عمارتوں کو شدید نقصان پہنچا۔ بڑے پیمانے پر جانی نقصان کا خدشہ ہے۔
صیہونی حملوں کے نتیجے میں غزہ کا بیشتر حصہ ملبے کا ڈھیر بن گیا۔ رہائشی عمارتوں اور مکانات کی تباہی سے اٹھارہ لاکھ افراد بے گھر ہوچکے ہیں۔
اسرائیلی فوج نےمصر کی سرحد پر واقع رفح شہر میں بھی بڑی کارروائی کی تیاری کرلی ہے۔ اسرائیلی ایجنسی شن بیت نے قطر، ترکیہ اور لبنان میں بھی حماس رہنماؤں کو نشانہ بنانے کی دھمکی دی ہے۔ صیہونی فوج کی مقبوضہ مغربی کنارے میں چھاپہ مار کارروائیاں جاری ہیں۔ ٹینکوں اور بکتربندگاڑیوں کے ساتھ فوجی قلقیلیہ ۔ جیریکو، جنین اور تلکرم میں گھس گئے۔ فائرنگ سے دو فلسطینی شہید ہوگئے۔ 60 فلسطینیوں کو گرفتار کر لیا۔