Raza Musani 
غزہ : صیہونی فوج نے صبح سویرے غزہ سٹی میں رہائشی علاقوں پر شدید حملے کئے ہیں جس کے نتیجے میں خواتین اور بچوں سمیت انسٹھ فلسطینی شہید اور درجنوں زخمی ہوگئے۔
صیہونی فوج نے سب سے مہلک حملہ نصیرات کیمپ میں ایک مکان پر کیا جس میں ایک ہی گھر کے نو افراد کو شہید کردیا گیا۔ جنگی طیاروں نے خان یونس ۔ الصابرہ اور الزویدہ کو اپنی درندگی کا نشانہ بنایا جہاں فضائی اور زمینی حملوں میں بڑے پیمانے پر شہادتیں ریکارڈ کی گئیں۔
اسرائیلی حملوں میں کئی مکانات اور رہائشی عمارتیں ملبے کا ڈھیر بن گئیں اور بڑی تعداد میں مکین ملبے تلے دب گئے۔
امداد کی بندش سے قحط کی صورتحال سنگین ہوتی جارہی ہے۔ بھوک کی شدت سے دو بچے زندگی کی بازی ہارگئے۔ فلسطینی مہاجرین کے لئے اقوام متحدہ کے ادارے انروا نے رپورٹ دی ہے کہ غزہ میں ہر تین میں سے ایک بچہ چوبیس گھنٹوں میں مکمل طور پر بھوکا رہنے پر مجبور ہے۔
