Raza Musani 
لندن : امریکی صدر ڈونلڈ ٹرمپ کے سرکاری دورے کے اختتام کے بعد برطانیہ فلسطینی ریاست کو باضابطہ طور پر تسلیم کر لے گا۔
برطانوی اخبار دی ٹائمز کے مطابق وزیراعظم سرکیئر اسٹارمر فرانس کی قیادت میں کئی ممالک سے پہلے فلسطینی ریاست کو تسلیم کرنے کا ارادہ رکھتے ہیں اور یہ فیصلہ غزہ میں جاری جنگ کے حوالے سے تشویش کے پیش نظر کیا جا رہا ہے۔ وزیراعظم نے جولائی میں کہا تھا کہ اگر اسرائیل غزہ میں انسانی بحران کم کرنے اور جنگ بندی پر تیار نہ ہوا تو برطانیہ فلسطینی ریاست کی تسلیم کرلے گا۔ رپورٹ میں کہا گیا ہے کہ اسٹارمر کو اپنی لیبر پارٹی کے اندر سے فلسطین کو ریاست تسلیم کرنے کے لیے بہت زیادہ دباؤ کا سامنا ہے، لیکن وہ یہ فیصلہ اس وقت تک نہیں کرسکتے جب تک ٹرمپ برطانیہ سے روانہ نہیں ہو جاتے۔
امریکی وزیر خارجہ مارکو روبیو نے جنرل اسمبلی کے دوران فلسطینی ریاست کو تسلیم کرنے پر غور کرنے والے ممالک کو خبردار کیا تھا کہ اسرائیل اس کے جواب میں مغربی کنارے کو ضم کرنے جیسا جوابی اقدام اٹھا سکتا ہے۔
