Raza Musani 
لندن : برطانیہ کو اسرائیلی وزیر اعظم بنیامین نیتن یاہو کے بین الاقوامی فوجداری عدالت کے وارنٹ گرفتاری کی ممکنہ حمایت پر سیاسی بدامنی کا خدشہ لاحق ہوگیا۔ گارڈین اخبار کے مطابق برطانوی حکومت کا ماننا ہےکہ اگر آئی سی سی اسرائیلی حکام کے جنگی جرائم کے الزام میں وارنٹ گرفتاری جاری کرنے پر راضی ہو جائے تو برطانیہ میں سیاسی نتائج سامنے آئیں گے۔ واضح رہے کہ برطانیہ کو آئی سی سی کو تحریری مشاہدات فراہم کرنا تھے کہ آیا کہ عالمی عدالت اسرائیلی شہریوں پر اپنے دائرہ اختیار کو استعمال کر سکتی ہے یا نہیں۔ جولائی میں انتخابات کے بعد نئی حکومت نے اعلان کیا تھا کہ وہ ان کوششوں کو آگے نہیں بڑھائے گی۔ گارڈین کی رپورٹ کے مطابق حکومت کو خدشہ ہے کہ برطانیہ میں مضبوط ایران مخالف لابی سوال کرے گی کہ جب برطانیہ ایرانی پاسداران انقلاب پر پابندی نہیں لگاتا ہے تو وہ اپنے اتحادی اسرائیلی وزیراعظم کی گرفتاری کو کیوں ترجیح دے رہا ہے۔
