Raza Musani 
امریکی صدر ٹرمپ کی جانب سے اضافی ٹیرف کے بعد انڈیا میں امریکی مصنوعات کے بائیکاٹ کی مہم زور پکڑ گئی ہے۔ برطانوی خبر رساں ادارے رائٹرز کے مطابق کاروباری افراد اور حکومت کے حامی ٹیرفس کے اعلان کے بعد امریکا مخالف جذبات کو ہوا دے رہے ہیں اور امریکی مصنوعات کے بائیکاٹ پر زور دے رہے ہیں اس میں میکڈونلڈز، کوکا کولا، ایمیزون اور ایپل جیسی بڑی کمپنیاں بھی شامل ہیں۔
انڈیاز واؤ سکن سائنس کے شریک بانی منیش چوہدری نے لنکڈ ان پر ویڈیو میں میڈ ان انڈیا مصنوعات پر زور دیا۔ گاڑی کی سہولت فراہم کرنے والی کمپنی ‘ڈرائیو یو’ کے سی ای او راہم شاستری نے لکنڈ ان پر لکھا کہ انڈیا کے پاس بھی چین کی طرح اپنا ٹوئٹر، گوگل، یوٹیوب، واٹس ایپ اور فیس بک ہونا چاہیے۔
وزیراعظم نریندر مودی نے بنگلور میں اجتماع سے خطاب میں کہا تھا کہ انڈین کمپنیاں دنیا کے لیے چیزیں بناتی ہیں لیکن اب وقت آ گیا ہے کہ پہلے انڈیا کی ضروریات کو ترجیح دی جائے۔
