حلال سرٹیفکیٹ پر پابندی مذہبی معاملات میں مداخلت ہے، مسلم پرسنل لاء بورڈ

نئی دہلی: آل انڈیا مسلم پرسنل لاء بورڈ نے اترپردیش حکومت کے حلال سرٹیفکیٹ جاری کرنے کو غیر قانونی قرار دینے کی مذمت کی ہے. مسلم پرسنل لاء بورڈ کے مطابق اترپردیش حکومت کا فیصلہ مذہبی معاملات اور مذہبی آزادی میں مداخلت اور ملک کے مفاد کے منافی ہے۔ بورڈ کے ترجمان ڈاکٹر سید قاسم رسول الیاس نے ایک بیان میں کہاکہ اسلام نے کھانے پینے اور رہن سہن کے کچھ آداب اور ضوابط متعین کئے ہیں جس کی پابندی مسلمانوں کے لئے ضروری ہے۔ قاسم رسول الیاس نے کہا کہ حلال سرٹیفیکیشن پر پابندی لگا کر دراصل یوگی حکومت ہندوستانی مصنوعات کی مسلم و دیگر ممالک میں بر آمدات کو متأثر کرے گی اور اس سے صرف ان کمپنیوں کو ہی نقصان نہیں ہوگا بلکہ ہندوستان کی معیشت اور زرمبادلہ کا کاروبار بھی شدید طور متأثر ہوگا۔ مودی اور یوگی حکومتوں کو اپنے سیاسی فائدہ اور ہندو مسلم منافرت کے ایجنڈے سے اوپر اٹھ کر ملک کے مفاد اور مذہبی آزادی کے دستوری تقاضے کو ہی ترجیح دینی چاہیئے۔