Raza Musani 
پاراچنار: پاراچنار جانیوالے اشیائے خوردونوش کے قافلے کو سخت سیکیورٹی کے باوجود لوٹ لیا گیا۔ بگن کے مقام پر مسلح دہشتگردوں نے ناکہ لگا کر ٹرک روکے اور لوٹ مار کے بعد انہیں آگ لگادی۔
ہنگو کے علاقے ٹل سے پاراچنار کے تاجروں کے اشیائے خوردونوش کے 35 ٹرک سخت سیکیورٹی میں پاراچنار کیلئے روانہ کئے گئے۔ ٹرکوں کا قافلہ بگن کے مقام پر پہنچا تو درجنوں مسلح افراد نے حملہ کرکے ٹرکوں کو روک لیا۔ مسلح افراد نے بیشتر ٹرکوں سے سامان لوٹ لیا۔ اور انہیں آگ لگادی۔ دہشت گرد کئی گھنٹوں تک لوٹ مار کرتے اور آگ لگاتے رہے اور انہیں کسی مزاحمت کا سامنا نہیں کرنا پڑا۔
ایڈیشنل ڈپٹی کمشنر کرم کے مطابق تیسرے قافلے پر دہشت گردوں نے راکٹوں سے حملہ کیا۔ جس سے چھ ٹرکوں کو نقصان پہنچا۔
دہشتگردوں کی فائرنگ سے ایک ٹرک ڈرائیور تنویر عباس شہید ہوگیا جو ادویات کا ٹرک لیکر جاررہا تھا۔ جبکہ متعدد ٹرک ڈرائیور اور کنڈکٹر تاحال لاپتہ ہیں۔
ضلعی انتظامیہ نے دعویٰ کیا کہ فائرنگ سے ایک اہل کار شہید جبکہ چار اہلکار زخمی ہوگئے جبکہ جوابی کارروائی میں چھ حملہ آور مارے گئے۔
