اسپتال، خیموں، مکانات، امدادی ہجوم پر حملے، مزید 42 فلسطینی شہید

غزہ : صیہونی فوج نے غزہ میں اسپتال۔ خیموں ۔ مکانات اور امدادی ہجوم پر حملوں میں خواتین اور بچوں سمیت مزید بیالیس فلسطینی شہید اور درجنوں زخمی کردئے۔
صیہونی فوج نے العہلی عرب اسپتال کے احاطے میں بے گھر افراد کے لئے لگے خیموں پر ڈرون حملہ کیا جس کے نتیجے میں سات فلسطینی شہید اور کئی زخمی ہوگئے۔ دیرالبلاح میں مکان پر حملے میں پانچ فلسطینی شہید کردئے گئے۔ غزہ سٹی میں مختلف مقامات اور مضافاتی علاقوں میں بھی بمباری اور گولہ باری کی گئی۔ صیہونی فوج نے الزیتون کے مضافات میں بھی خیموں پر فضائی حملہ کیا جس کے نتیجے میں خواتین اور بچوں سمیت نو فلسطینی شہید ہوگئے۔
دھر رفح اور خان یونس میں صیہونی فوج نے فائرنگ کرکے امداد کیلئے جمع چودہ فلسطینیوں کو شہید اور درجنوں کو زخمی کردیا۔ دوسری جانب فاقہ کشی کی وجہ سے تین بچوں سمیت گیارہ فلسطینی دم توڑ گئے۔
ادھر اقوام متحدہ کی ایجنسی انروا نے خبردار کیا ہےکہ غزہ میں دس لاکھ خواتین اور لڑکیوں کوبڑے پیمانے پر غذائی قلت کا سامنا ہے۔ بیان میں کہا گیاہےکہ خواتین کو بقا کی خطرناک حکمت عملی اپنانے پر مجبور کیا جا رہا ہے وہ موت کے انتہائی خطرے کے باوجود خوراک اور پانی کی تلاش میں نکلنے پر مجبور ہیں۔