Raza Musani 
صنعا: عرب اتحاد نے یمن کے شہر مارب میں حوثی ملیشیا کی پیشقدمی روکنے کیلئے وحشیانہ بمباری کردی۔ مآرب کے علاقوں العبدیہ، الجوبہ اور ملعا کو فضائی حملوں کا نشانہ بنایا گیا۔ ان حملوں کے نتیجے میں 165 افراد جاں بحق اور درجنوں زخمی ہوگئے۔ عرب اتحاد نے دعویٰ کیا ہے کہ حوثی ملیشیا کی پیش قدمی روکنے کے لیے العبدیہ اور مارب پر 32 فضائی حملے کیے گئے ان حملوں میں 41 گاڑیوں کو تباہ کیا گیا اور حوثی ملیشیا کو بھاری نقصان پہنچایا گیا۔ عرب اتحاد نے دعوی کیا ہے کہ مارب میں فضائی حملوں میں اب تک 700 سے زائد افراد ہلاک ہوچکے ہیں۔ حوثیوں کے ترجمان محمد عبدالسلام نے کہا ہے کہ انہیں القاعدہ اور داعش کے دہشت گردوں کا سامنا ہے جن کی عرب اتحاد سرپرستی کررہا ہے۔ لڑائی میں شدت اختیارکرنے کے بعد مآرب میں کئی مقامات پر شہریوں کی نقل مکانی تعداد میں اضافہ ہوگیا ہے۔ یمنی مسلح افواج کے ترجمان بریگیڈیئر جنرل یحییٰ ساری نے آپریشن ربیع النصر کی تفصیلات بتائے ہوئے کہا ہے کہ بڑے پیمانے پر حملہ میں اہداف کو کامیابی سے حاصل کیا۔اسٹریٹجک صوبوں شبوا اور مآرب میں تازہ ترین پیش رفت کے دوران 3،200 مربع کلومیٹر زمین کو آزاد کرالیا اور عرب اتحاد کے عسکریت پسندوں کو بھاری نقصان پہنچایا۔
