بھوکے متاثرین کا ایک اور قتل عام، 23 فلسطینی شہید، درجنوں زخمی

غزہ : صیہونی فوج نے غزہ میں بھوکے اور نہتے متاثرین کا ایک اور قتل عام کیا ہے۔ اندھا دھند فائرنگ سے تئیس فلسطینی شہید اور درجنوں زخمی ہوگئے۔ صیہونی فوج نے بیت لاہیہ میں امداد کیلئے جانیوالے بھوکے متاثرین پر اندھا دھند گولیاں برسادیں۔ فائرنگ سے خواتین اور بچوں سمیت کئی فلسطینی زخمی ہوگئے جن میں سے بعض کی حالت تشویشناک ہے۔ صیہونی فوج کے بھوکے متاثرین پر حملوں میں اب تک دوسو سے زائد فلسطینی شہید کئے جاچکے ہیں۔ ادھر صیہونی فوج نے شمالی اور وسطیٰ غزہ میں مختلف علاقوں پر فضائی اور زمینی حملے کئے ہیں جس میں کئی فلسطینی شہید کردئے گئے۔
صیہونی فوج کے حملوں میں چوبیس گھنٹوں کے دوران اناسی فلسطینی شہید کئے جاچکے ہیں۔ صیہونی فوج نے خان یونس کو مکمل طور پر خالی کرنے کا الٹی میٹم دے دیا ہے۔