شام کے شہر حمص پر پھر ڈرون حملہ، ملک میں سوگ، شہدا کی تعداد 123 ہوگئی

دمشق: شام کے شہر حمص پر ایک اور ڈرون حملہ کیا گیا جبکہ شامی فوج نے عسکریت پسندوں کے ٹھکانوں کو نشانہ بنایا۔ شامی فوج نے حمص میں ملٹری کالج پر حملے کے جواب میں شمالی شام میں ادلب گورنری میں مسلح گروپوں کے مقامات پر بمباری کی اور کئی ٹھکانے تباہ کردئے۔ حملے میں 14 افراد ہلاک اور کئی زخمی ہوگئے۔ ملٹری کالج پر خونی ڈرون حملے کے 24 گھنٹوں کے اندر حمص میں ایک نیا ڈرون حملہ کیا گیا ہے۔ حملے کرنے والے ڈرون سے متعلق معلوم نہیں ہو سکا کہ کس نے بھیجا تھا۔ ادھر ملٹری کالج پر حملے میں مرنے والوں کی تعداد 123 ہو گئی ہے جبکہ 277 زخمی ہیں۔ مرنے والوں میں 54 عام شہری بھی شامل ہیں۔ ان میں 39 بچے اور خواتین بھی شامل ہیں۔ ملک بھر میں حملے کا سوگ جاری ہے اور مرنے والے کیڈٹس کو فوجی اعزاز کے ساتھ سپرد خاک کردیا گیا۔