ایک سال میں مزید سوا کروڑ پاکستانی غریب ہوگئے، عالمی بینک

اسلام آباد: عالمی بینک نے کہاہےکہ پاکستان میں معیشت تباہی کے دہانے پرہے۔ ایک سال میں مزید سوا کروڑ افراد غریب ہوگئے۔ پاکستان میں عالمی بینک کے کنٹری ڈائریکٹر ناجی بینہسین نے نیوز بریفنگ میں پاکستان کیلئے نیا انتباہ جاری کیا ہے۔انہوں نے کہا کہ پاکستان بحران کے ایسے مقام پر کھڑا ہے جہاں اسے اشرافیہ کی گرفت اور فوجی، سیاسی اور کاروباری رہنماؤں کے مفادات کے تحت پالیسی فیصلوں کے تحت پسماندہ رہنا ہے یا پھر تابناک مستقبل کے لیے راستہ تبدیل کرنا ہے۔ انہوں نے کہا کہ پاکستان کا معاشی ماڈل اب غربت میں کمی نہیں کر رہا ہے اور یہ بہت تشویشناک ہے۔ ساڑھے 9 کروڑ افراد غربت کی زندگی گزار رہے ہیں۔ اور گزشتہ مالی سال غربت بڑھ کر 39.4 فیصد تک پہنچ گئی ہے۔ انہوں نے کہا کہ فی کس آمدنی کے حساب سے پاکستان کا شمار خطے میں فہرست کے نچلے ممالک میں ہوتا ہے۔ انہوں نے کہا کہ پاکستان اپنی مقدس گائیوں’’ زراعت اور رئیل اسٹیٹ‘‘ پر ٹیکس لگانے کیلئے فوری اقدامات کرے اور اپنے بے جا اخراجات کم کرے۔