غزہ کی پٹی پر اسرائیلی قبضہ بڑی غلطی ہو گی، جوبائیڈن

واشنگٹن: امریکی صدر جو بائیڈن بھی غزہ میں زمینی حملے میں اسرائیل کے تباہ کن نقصانات سے گھبرا گئے۔ امریکی ٹی وی سے انٹرویو میں تسلیم کیا کہ اسرائیل کی جانب سے غزہ کی پٹی پر قبضہ ایک بڑی غلطی ہو گی۔ جوبائیڈن نے دعویٰ کیا کہ حماس تمام فلسطینیوں کی نمائندگی نہیں کرتی۔ دو ریاستی حل کے لیے دیرینہ امریکی مطالبے کو دہراتے ہوئے صدر جو بائیڈن نے کہا کہ ایک فلسطینی اتھارٹی کی ضرورت ہے امریکی صدر نے خبردار کیا کہ حزب اللہ اس تنازع میں نہ کودے اور اسے مزید ہوا نہ دے۔ جو بائیڈن نے کہا کہ وہ اسرائیل سے یرغمال بنائے گئے 13 امریکیوں کی جلد رہائی کے لیے سر توڑ کوششیں کر رہے ہیں۔ ان کے مطابق ابھی اس سے متعلق تفصیلات تو نہیں بتائی جا سکتیں مگر خیال یہی ہے کہ ان شہریوں کو حماس نے یرغمال بنایا ہے۔ جو بائیڈن کے مطابق وہ اپنی طاقت کا بھرپور استعمال کرتے ہوئے امریکی شہریوں کی رہائی کے عمل کو یقینی بنائیں گے۔