امریکا مذاکرات میں مبہم زبان سے پرہیز کرے تو معاہدہ ہو سکتا ہے، ایرانی وزیر خارجہ

تہران : ایرانی وزیر خارجہ امیرعبداللہیان نے کہا کہ اگر امریکا ایٹمی معاہدہ سے متعلق مذآکرات کے دوران مبہم زبان سے پرہیز کرے تو معاہدہ جلد ازجلد ہو سکتا ہے۔ ایران کے وزیر خارجہ نے چینی ہم منصب وانگ یی سے ٹیلی فون پر بات کی اور دوطرفہ معاملات، علاقائی اور بین الاقوامی مسائل، ایٹمی معاہدہ کے مذاکرات اور ایران پر پابندیاں کے اختتام جیسے امور پر تبادلہ خیال کیا۔ امیرعبداللہیان نے کہا کہ ہم ایک اچھے، مضبوط اور پائیدار معاہدے تک پہنچنے کے لئے سنجیدہ ہیں لیکن اگر امریکا مذاکرات کے دوران ابہام انگیز زبان سے پرہیز کرے تو کم ترین ممکنہ وقت میں کسی نتیجہ تک پہنچا جا سکتا ہے اور معاہدہ ہو سکتا ہے۔ چینی وزیر خارجہ نے اس گفتگو میں ایرانی صدر آیت اللہ رئیسی کو سلام پہنچایا اور کہا کہ ان کا ملک ایران کے ساتھ پہلے سے زیادہ تعلقات کو مضبوط کرنے کا خواہاں ہے۔