Raza Musani 
ریاض : سعودی عرب۔ قطر۔ عراق۔ عمان اور پاکستان سمیت کئی ممالک نے ایران پر امریکا کے حملے کی مذمت کرتے ہوئے اسے بین الاقوامی قوانین کی کھلی خلاف ورزی قرار دیا ہے۔
سعودی وزارت خارجہ نے ایک بیان میں کہا ہے کہ ایرانی جوہری تنصیبات کو نشانہ بنانے پر شدید تشویش ہے۔ سعودی عرب نے کشیدگی کم کرنے، تحمل سے کام لینے اور مزید بگاڑ سے گریز کی کوششوں پر زور دیا ہے۔ پاکستان نے کہاہےکہ امریکی حملے اسرائیلی حملوں کا تسلسل ہیں، یہ حملے بین الاقوامی قانون کی تمام اقدار کی خلاف ورزی ہیں۔
عمان کی وزارت خارجہ نے خبردار کیا ہے کہ امریکا کا یہ اقدام تنازعہ کو مزید پھیلانے کا سبب بن سکتا ہے اور بین الاقوامی قانون اور اقوام متحدہ کے چارٹر کی کھلی خلاف ورزی ہے۔ قطر نے خطرناک کشیدگی کو علاقائی اور بین الاقوامی سطح پر تباہ کن نتائج کا پیش خیمہ قرار دیا ہے۔
عراق نے کہا ہے کہ یہ فوجی کشیدگی خطے کے امن و سلامتی کے لیے ایک سنجیدہ خطرہ ہے۔
