Raza Musani 
نیو یارک : نیو یارک میں خالصتانی رہنما کے قتل کا منصوبہ ناکام بناکر ہندوستانی شہری کو گرفتار کرلیا گیا۔ امریکی عدالت نے فرد جرم عائدکردی۔ امریکی محکمہ انصاف کے مطابق گرفتار ملزم نکھل گپتا عرف نِک نے سکھ رہنما گُرپتونت سنگھ کو مارنے کیلئے کرائے کے قاتل کی خدمات ایک لاکھ ڈالر کے عوض حاصل کرنے کی کوشش کی تھیں۔ محکمہ انصاف کے مطابق ہندوستانی سرکاری اہلکار نے نکھل گپتا و دیگر افراد کے ساتھ مل کر ہندوستان اور کسی دوسری جگہ سے گُرپتونت سنگھ کے قتل کامنصوبہ بنایا۔ عدالتی دستاویز میں ہندوستانی اہلکار کی شناخت کیلئے نام کے بجائے سی سی ون کا لفظ استعمال کیا گیا ہے۔ دستاویز کے مطابق سی سی ون حکومتی ایجنسی کے ملازم ہیں جو خود کو سینیئر فیلڈ آفیسر کہتے ہیں اور اُنہیں سکیورٹی منیجمنٹ کی ذمہ داریاں سونپی گئی ہیں۔ باون سالہ نکھل گپتا کو تیس جون کو جمہوریہ چیک میں گرفتار کرکے امریکہ منتقل کیا گیا تھا. نکھل گپتا کیخلاف فردِ جرم عائد کرنے کی کارروائی شروع کردی گئی ہے۔ ایف بی آئی کیس کی مزید تفتیش کررہی ہے۔
