امریکا جان لے کہ ایرانی قوم کو جھکایا نہیں جا سکتا، ولی امر مسلمین

تہران: ولی امر مسلمین آیت اللہ خامنہ ای نے کہا ہے کہ امریکا کو معلوم ہونا چاہیے کہ ایران سرینڈر نہیں کرے گا۔ ٹی وی پر خطاب میں آیت اللہ خامنہ ای نے کہا کہ امریکا کا کوئی بھی حملہ سنگین اور ناقابل تلافی نتائج کا باعث بنےگا۔ انہوں نے کہا کہ امریکی جان لیں کہ ایرانی قوم کو جھکایا نہیں جا سکتا عوام شہدا کے خون اور اپنی سرزمین پر حملے کو فراموش نہیں کریں گے۔ اسرائیل نے بڑی غلطی کی ہے اسے اس کی سزا ضرور ملےگی۔
انہوں نے کہا کہ جو لوگ ایران کی تاریخ سے واقف ہیں وہ ایران سے دھمکی کی زبان میں بات نہیں کرتے۔ انہوں نے صیہونی حکومت کے بزدلانہ حملوں کے مقابلے میں بہادری، استقامت اور بصیرت کے ساتھ قیام پر عوام کو خراج تحسین پیش کیا اور تاکید کی کہ ایرانی قوم غیروں کی مسلط کردہ جنگ میں پوری استقامت کے ساتھ کھڑی ہوگی۔ ہم اغیار کے سامنے کبھی سر تسلیم خم نہیں کریں گے۔
خطاب کے آخر میں آپ نے کہا کہ یقین رکھو کہ اللہ تعالیٰ ملت ایران، حق اور سچائی کو ضرور کامیاب کرے گا۔