امریکا غریب ملک شام کے وسائل کو بری طرح لوٹ رہا ہے، چین

بیجنگ : چین نے غریب ملک شام پر غیرقانونی قبضے اور اس کے وسائل لوٹنے پر امریکا کو شدید تنقید کا نشانہ بنایا ہے۔چینی وزارت خارجہ کے ترجمان نے شام میں امریکی فوجی دستوں کی غیر قانونی موجودگی کی مذمت کرتے ہوئے کہا ہے کہ واشنگٹن کی جانب سے جنگ زدہ ملک کی توانائی اور معدنی وسائل کی مسلسل لوٹ مار نے شامی عوام کے مصائب کو مزید بڑھا دیا ہے۔ شام میں بڑے پیمانے پر امریکی لوٹ مار کو دیکھنا خوفناک ہے۔جو اس وقت سے جاری ہے جب شام ایک دہائی سے زیادہ عرصے سے جاری سنگین انسانی بحران سے نکلنے کی کوشش کر رہا ہے۔ دنیا کے امیر ترین ملک کا کسی غریب کو لوٹنے سے بڑا ظلم کوئی نہیں۔ ترجمان نے زور دے کر کہا کہ شام بھر میں امریکی فضائی حملوں کے نتیجے میں بڑی تعداد میں شہری ہلاکتیں ہوئی ہیں اور بے تحاشا معاشی نقصان ہوا ہے اور ایک کروڑ 20لاکھ سے زیادہ لوگ بے گھر ہوئے ہیں۔ ترجمان نے شام پر امریکا کی سخت اقتصادی پابندیوں کی مذمت کرتے ہوئے کہا کہ پابندیوں نے شامی قوم کو بنیادی ضروریات زندگی سے محروم کر دیا ہے اور ملک کی اقتصادی ترقی اور تعمیر نو میں شدید رکاوٹیں کھڑی کر دی ہیں۔
امریکی فوجی شام کے تیل، قدرتی گیس اور دیگر قدرتی وسائل کو کنٹرول کرتے ہیں۔ انہوں نے شام کے تیل کے اہم ذخائر پر قبضہ جاری رکھا ہوا ہے اور ملک کی 80 فیصد سے زیادہ تیل کی مصنوعات کو لوٹ لیا ہے۔ انہوں نے شام کے اناج کے ذخیرے کو اسمگل کرکے جلا دیا ہے، جس سے وہاں انسانی بحران میں اضافہ ہوا ہے ۔