امریکا غزہ جنگ میں براہ راست ملوث ہے، ولی امر مسلمین

تہران: ولی امر مسلمین آیت اللہ سید علی خامنہ ای نے تہران میں عراقی وزیر اعظم سے ملاقات میں کہا ہے کہ امریکا غزہ جنگ میں براہ راست ملوث ہے۔ ولی امر مسلمین نے قتل عام روکنے کے لیے امریکہ اور صیہونی رجیم پر عالم اسلام کے بڑھتے ہوئے سیاسی دباؤ پر مزید زور دیا اور عراقی وزیر اعظم شیاع السوڈانی سے کہاکہ عراق، خطے کے ایک اہم ملک کی حیثیت سے اس میدان میں اپنا خاص کردار ادا کر سکتا ہے۔ انہوں نے غزہ کی قابل رحم صورتحال اور صیہونی جرائم اور مظالم سے تمام آزاد انسانوں کے غمناک ہونے کی طرف اشارہ کیا اور کہاکہ صیہونی رجیم کے حملوں کے پہلے دن سے ہی تمام شواہد امریکیوں کے اس جنگ میں براہ راست ملوث ہونے کی طرف اشارہ کرتے ہیں۔ جنگ میں جتنی وسعت اور تباہی آرہی ہے اتنے ہی امریکہ کی صیہونی رجیم کے جرائم کی براہ راست سرپرستی کے شواہد اور مضبوط ہوتے جا رہے ہیں۔ انہوں نے کہاکہ غزہ میں تمام تر قتل عام کے باوجود صیہونی حکومت کو شکست ہوئی ہے اور وہ اب تک ناکام رہی ہے کیونکہ وہ اپنی کھوئی ہوئی ساکھ کو بحال نہیں کر سکی ہے اور نہ ہی مستقبل میں ایسا کر سکے گی۔