محرم میں بلارکاوٹ و آزادی کیساتھ عزادری یقینی بنانے کے اقدامات کئے جائیں، علامہ ساجد نقوی

راولپنڈی: شیعہ علماء کونسل کے سربراہ علامہ سید ساجد علی نقوی نے مطالبہ کیا ہے کہ ارباب اختیار محرم الحرام میں مجالس، محافل اور جلوس ہائے عزا کے انعقاد کو بلارکاوٹ و آزادی کیساتھ یقینی بنانے کے اقدامات جاری کریں۔ محرم و صفرالمظفر کے ایام کو لوڈشیڈنگ فری ایام بھی قرار دیئے جائیں تاکہ نہ صرف عقیدت مند شہدائے کربلا کو بھرپور انداز میں خراج عقیدت پیش کرسکیں بلکہ دہشت گردی و تخریب کاری کو ناکام بنانے میں یہ عمل معاون ثابت ہوسکے۔ صدرمملکت عارف علوی اور وزیراعظم میاں محمد شہباز شریف کے نام خط میں علامہ ساجد نقوی نے لکھا کہ یکم تا 10 محرم الحرام میں شہدائے کربلا اور فلسفہ کربلا کے حوالے سے الیکٹرانک میڈیا پر خصوصی پروگرامز، نشریات اور پرنٹ میڈیا پر خصوصی کالمز، مضامین اورخصوصی ضمیموں کی سابقہ روایات کو برقرار رکھا جائے اور محدودیت سے گریز کیا جائے۔ علامہ ساجد نقوی نے مزید لکھا کہ ان ایام میں بجلی کے ترسیلی نظام کو یقینی و موثر بنایا جائے تاکہ ایک طرف عقیدت مندان شہدائے کربلا کو بھرپور انداز میں جہاں خراج تحسین پیش کرسکیں، وہیں دہشت گردوں اور تخریب کاروں کے مذموم مقاصد کو بھی ناکام بنانے میں میںیہ عمل معاون ثابت ہوسکے۔