اسرائیل کو اسلحہ کی فراہمی پر پابندی عائد کی جائے، الحق

رام اللہ : فلسطینی انسانی حقوق کی تنظیم الحق نے اقوام متحدہ کی ماہر فرانسیسکا البانیز کی حالیہ رپورٹ کا خیرمقدم کرتے ہوئے اسرائیل پر عالمی سطح پر اسلحہ کی پابندی عائد کرنے کا مطالبہ کیا ہے۔ الحق نے اپنے بیان میں کہا کہ البانیز کی رپورٹ واضح کرتی ہے کہ کس طرح تیسرے فریق ممالک خصوصاً امریکہ اور یورپی ریاستیں، مسلسل عسکری اور سیاسی تعاون کے ذریعے اسرائیل کی جنگی کارروائیوں کو ممکن بنا رہی ہیں۔ تنظیم نے کہا کہ بڑے پیمانے پر فوجی امداد اور اسلحے کی فراہمی نے اسرائیل کو فلسطینی عوام کی تباہی کا اختیار دیا ہے، جنہیں دو برسوں سے غیر انسانی مظالم کا سامنا ہے۔ الحق نے مطالبہ کیا کہ اسرائیل کے خلاف دو طرفہ اسلحہ پابندی عائد کی جائے، بین الاقوامی قوانین کی خلاف ورزیوں میں ملوث اسرائیلی حکام پر پابندیاں لگائی جائیں، اور ہر وہ فوجی، تجارتی یا سفارتی تعاون ختم کیا جائے جو فلسطینیوں کے خلاف اسرائیلی جرائم کو سہارا دے رہا ہے۔