Raza Musani 
کابل: افغانستان نے چین، روس، ایران اور پاکستان کے اس مشترکہ مؤقف کا خیرمقدم کیا ہے جس میں ملک میں غیر ملکی فوجی اڈوں کے دوبارہ قیام کی مخالفت کی گئی ہے۔ طالبان عبوری حکومت کے نائب ترجمان حمد اللہ فطرت نے یہ بیان چاروں ممالک کے وزرائے خارجہ کی نیویارک میں اقوام متحدہ کی جنرل اسمبلی کے موقع پر ملاقات کے بعد جاری کیا۔ فطرت نے کہا کہ افغان سرزمین کسی ملک کے خلاف استعمال نہیں ہو گی اور نہ ہی کسی مسلح گروہ کو ملک میں سرگرم ہونے دیا جائے گا۔ ان کا مزید کہنا تھا کہ افغانستان بدعنوانی اور منشیات کے خلاف اقدامات کو اپنی ذمہ داری سمجھتا ہے اور تمام ممالک سے باہمی احترام کی بنیاد پر مثبت تعلقات چاہتا ہے۔ یہ پیش رفت اس وقت سامنے آئی ہے جب امریکی صدر ڈونلڈ ٹرمپ نے خبردار کیا تھا کہ اگر طالبان نے بگرام ایئر بیس پینٹاگون کے حوالے نہ کیا تو برے نتائج ہوں گے۔
