Raza Musani 
اسلام آباد: پاکستان نے دعویٰ کیاہےکہ افغان طالبان نے استنبول مذاکرات سے متعلق حقائق کو توڑ مروڑ کر پیش کیا ہے۔ سماجی رابطے کی ویب سائٹ ایکس پر جاری بیان میں وزارت اطلاعات و نشریات نے افغان ترجمان کے مبینہ گمراہ کن بیان کو مسترد کردیا انہوں نے کہا کہ پاکستان نے افغان سرزمین پر موجود دہشتگردوں کی گرفتاری کا مطالبہ کیا ہے۔ افغان فریق کے دعوے پر پاکستان نے فوری طور پر تحویل کی پیشکش کی، پاکستان کا مؤقف واضح، مستقل اور ریکارڈ پر موجود ہے۔ پاکستان نے واضح کیا کہ دہشتگردوں کی حوالگی سرحدی انٹری پوائنٹس سے ممکن ہے۔ افعانستان کی خبررساں ایجنسی آریانہ نیوز کے مطابق ذبیح اللہ مجاہد نے دعویٰ کیا کہ پاکستان نے افغانستان سے مطالبہ کیا کہ وہ ان افراد کو افغانستان کے اندر ہی قابو میں رکھے بجائے اس کے کہ انھیں ملک بدر کیا جائے۔ ذبیح اللہ مجاہد نے زور دیتے ہوئے کہا کہ حکومت کی پالیسی مہاجرین کو اسلحہ لے جانے سے روکتی ہے اور اگر پاکستان قابلِ اعتماد معلومات دے کہ کوئی خطرہ موجود ہے تو مناسب کارروائی کرے گی۔
