Raza Musani 
مقبوضہ بیت المقدس : اسرائیل کی جانب سے اپنی کتابیں نصاب میں شامل کرنے کیخلاف مقبوضہ مشرقی القدس میں فلسطینی اسکولوں نے ایک روز کی ہڑتال کی۔ ہڑتال کی کال فلسطینی سیاسی دھڑوں کے اتحاد فلسطینی نیشنل اینڈ اسلامک فورسز نے دی تھی۔ اتحاد نے ایک بیان میں کہا کہ فلسطینی بچوں کو فلسطینی وزارت تعلیم سے منظور شدہ نصاب پڑھانے کا حق ہے۔ مسخ شدہ اسرائیلی نصاب نہیں۔ اسرائیلی حکام نے نئی نصابی کتابیں چھاپی ہیں جس میں مسخ شدہ فلسطینی تاریخ، ثقافت اور قومی نشانات شامل ہیں۔ اسرائیلی فیصلے نے مقبوضہ علاقوں میں احتجاج کی لہر دوڑا دی ہے۔ والدین اور طلباء نے مقدس شہر کے کئی محلوں میں مظاہرے کئے۔ مظاہرین نے بینرز اٹھا رکھے تھے، جن پر تحریر تھا کہ نصاب کو یہودی بنانا قبول نہیں۔ فلسطینیوں کا کہنا ہے کہ اس کا مقصد القدس بالخصوص اور فلسطین کے بارے میں عمومی طور پر حقائق کو مسخ کرنا ہے۔
