جوہری ہتھیاروں کی نئی دوڑ شروع ہونے کا خطرہ ہے، اقوام متحدہ

نیویارک : اقوام متحدہ کے سیکریٹری جنرل انتونیو گوتیرس نے دنیا کو جوہری ہتھیاروں کی نئی دوڑ شروع ہونے سے خبردار کیا ہے۔ انسداد ایٹمی ہتھیاروں کے دن پر انتونیو گوتیرس نے کہا کہ نئے ہتھیاروں کی ایک خطرناک دوڑ شروع ہو رہی ہے اور جوہری ہتھیاروں کی تعداد گذشتہ دہائیوں کے مقابلے میں پہلی بار بڑھ سکتی ہے۔ انہوں نے جوہری ہتھیاروں کی نئی دوڑ کو پاگل پن سے تعبیر کرتے ہوئے کہاکہ جوہری ہتھیاروں کا کسی بھی وقت، کسی بھی جگہ، کسی بھی تناظر میں استعمال، انسانی تباہی اور المیہ کا باعث بنے گا۔ ہمیں اپنا راستہ بدلنا ہوگا۔ گوتریس نے ایٹمی طاقتوں پر بھی تنقید کرتے ہوئے کہا کہ انہوں نے اپنے ہتھیاروں کے ذخیروں کو خوفناک حد تک اپڈیٹ کیا ہے اور ہتھیاروں تک رسائی کو بھی پیچیدہ بنایا جس کے باعث کھوج لگانا مشکل ہوگیا ہے۔ انہوں نے دنیا کے ممالک پر زور دیا کہ وہ تباہی کے دہانے سے پیچھے ہٹ جائیں۔