غزہ سٹی میں 2 اسپتالوں اور ایک اسکول پر حملہ، 77 فلسطینی شہید

غزہ : صیہونی فوج نے غزہ سٹی میں دو اسپتالوں اور ایک اسکول کو نشانہ بنایا۔ جبکہ مختلف مقامات پر حملے کرکے چوبیس گھنٹوں میں 77 فلسطینی شہید اور درجنوں زخمی کردئے۔
اسرائیلی ٹینک غزہ سٹی کے صابرہ اور تل الہوا میں پیش قدمی کرتے ہوئے داخل ہو گئے ہیں۔ جنگی طیاروں نے ایک اور بلند عمارت کو تباہ کردیا۔ صیہونی فوج نے الحیلو اسپتال اور الشفا اسپتال پر حملہ کیا جس سے الحیلو اسپتال کا ایک شعبہ تباہ ہوگیا اور الشفا اسپتال کو بھی نقصان پہنچا۔
صیہونی فوج نے چوبیس گھنٹوں کے دوران رہائشی عمارتوں، بےگھروں کی پناہ گاہوں اور خیموں پر بمباری کی جس سے بڑے پیمانے پر جانی نقصان ہوا۔ ادھر اسکول پر بھی حملہ کیا گیا جہاں متاثرین نے پناہ لے رکھی تھی حملے میں گیارہ فلسطینی شہید اور کئی زخمی ہوگئے۔
اسرائیلی فوج نے وسطی غزہ کی پٹی میں نصیرات کے شمال میں بے گھر افراد کو پناہ دینے والے خیموں پر بمباری کی جس سے سات فلسطینی شہید اور نو دیگر زخمی ہوئے.