Raza Musani 
غزہ : صیہونی فوج نے غزہ جنگ میں وقفے کے باوجود فضائی اور زمینی حملوں میں امداد کے منتظر چونتیس افراد سمیت مزید تریسٹھ فلسطینی شہید اور درجنوں زخمی کردئے۔
صیہونی فوج نے غزہ میں المواصی ۔ غزہ سٹی کو چھوڑ کر تمام علاقوں میں فضائی حملے اور زمینی کارروائیاں کیں جس میں قیمتی جانیں ضائع ہوئیں۔
ادھر بھوک کی شدت سے دو بچوں سمیت مزید چھ افراد زندگی کی بازی ہارگئے۔ جبکہ بین الاقوامی دباؤ کے بعد صیہونی فوج نے کئی راہداریاں امداد کیلئے کھول دی ہیں لیکن محدود امداد لے جانے کی اجازت دی جارہی ہے۔ کئی ماہ کے بعد اسرائیلی اشارے پر اردن اور مصر سے امدادی ٹرک غزہ میں داخل ہوگئے ہیں. جبکہ متحدہ عرب امارات اور اردن نے بھی اسرائیل تعاون سے فضا سے امداد گرانا شروع کر دی ہے۔ اردنی حکام کے مطابق پیرا شوٹ کے ذریعے پچیس ٹن امداد غزہ میں گرائی گئی۔
دوسری جانب اسرائیلی فوج نے فریڈم فلوٹیلا کولیشن کی کشتی حنظلہ کو اشدود بندرگاہ پہنچادیا۔ جہاں رضاکاروں سے پوچھ گچھ جاری ہے۔ اسرائیلی حکام نے کہاہے کہ رضاکاروں کو پوچھ گچھ کے بعد ان کے ممالک ڈیپورٹ کردیا جائے گا۔
