صیہونی حملوں میں مزید 51 فلسطینی شہید، بھوک سے 3 افراد چل بسے

غزہ : صیہونی فوج نے غزہ پر حملے کرکے چوبیس گھنٹوں کے دوران امداد کے متلاشی سترا افراد اور خواتین و بچوں سمیت اکاون فلسطینی شہید کردئے جبکہ بھوک سے تین فلسطینی دم توڑ گئے۔
صیہونی فوج نے رات گئے شمالی غزہ کے کئی علاقوں کو اپنے حملوں کا نشانہ بنایا ۔ خان یونس میں ایک خیمے پر میزائل حملے میں پانچ فلسطینی شہید اور کئی زخمی ہوگئے۔ دیر البلاح میں مکان پر گولہ باری سے چار فلسطینی جان سے گئے۔ غزہ سٹی میں تین مقامات کو ڈرون حملوں کا نشانہ بنایا گیا۔ ادھر امدادی مراکز اور خوراک کے حصول کیلئے جمع ہجوم پر فائرنگ کرکے سترہ فلسطینیوں کو شہید کیا گیا۔
بائیس ماہ سے جاری صیہونی حملوں میں شہدا کی تعداد باسٹھ ہزار سے تجاوز کرگئی ہے جس میں انیس ہزار بچے شامل ہیں۔