صنعا پر اسرائیلی حملے میں 4 افراد شہید، 67 زخمی ، غزہ کی حمایت جاری رہے گی، حوثی

صنعا: اسرائیلی فوج کے یمن کے دارالحکومت صنعا پر حملے میں 4 افراد شہید اور سڑسٹھ زخمی ہوگئے۔ یمن کے المسیرہ ٹی وی کے مطابق اسرائیل نے تیل کی ایک تنصیب۔ ایندھن کے ذخیرے اور پاور پلانٹ پر حملہ کیا ۔ جبکہ اسرائیل نے دعویٰ کیا کہ صدارتی محل کو بھی نشانہ بنایا جو فوجی کمپلیکس کے اندر واقع ہے۔ اسرائیلی فوج نے کہا ہےکہ یہ حملے حوثیوں کے اسرائیل اور اس کے شہریوں کے خلاف بار بار کیے جانے والے میزائل اور ڈرون حملوں کے جواب میں کیے گئے۔
المسیرہ ٹی وی نے ایک فوجی اہلکار کے حوالے سے بتایاکہ فضائی دفاعی نظام نے جارحیت میں حصہ لینے والے اسرائیلی دشمن کے بیشتر طیاروں کو بے اثر کر دیا اور انہیں بھاگنے پر مجبور کردیا۔
حوثی عہدیدار محمد البخیتی نے ایک بیان میں کہا کہ چاہے جتنی قربانیاں دینا پڑیں یمن کے خلاف اسرائیلی جارحیت ہمیں غزہ کی حمایت جاری رکھنے سے باز نہیں رکھ سکے گی۔