غزہ میں روزانہ 28 بچے موت کا شکار ہو رہے ہیں، یونیسیف

جنیوا : بچوں کی فلاح کے لئے کام کرنے والے اقوام متحدہ کے ادارے یونیسیف نے کہا ہے کہ غزہ میں روزانہ اٹھائیس بچے موت کا شکار ہورہے ہیں۔ سوشل میڈیا پلیٹ فارم ایکس پر ایک بیان میں یونیسیف نے کہاکہ غزہ میں بمباری۔ غذائی قلت۔ بھوک اور اہم خدمات کی کمی سے روزانہ ایک کلاس روم کے برابر بچوں کی اموات ہو رہی ہیں۔ بیان میں کہا گیاہے کہ غزہ کے بچوں کو خوراک، پانی، ادویات اور تحفظ کی ضرورت ہے لیکن کسی بھی چیز سے بڑھ کر انہیں فوری طور پر جنگ بندی کی ضرورت ہے۔
اُدھر ایک اور بیان میں خبردار کیا گیا ہےکہ قحط زدہ غزہ کی پٹی میں پانچ سال سے کم عمر کے تمام بچے جان لیوا غذائی قلت کے خطرے سے دوچار ہیں۔ تین لاکھ بیس ہزار بچوں کو محفوظ پانی، ماں کے دودھ کے متبادل اور علاج معالجے تک رسائی حاصل نہیں ہے۔