ڈھائی لاکھ ٹن کچرا، غزہ میں سنگین ماحولیاتی بحران نے سر اٹھالیا

غزہ : غزہ کی بلدیہ نے شہر میں سنگین ماحولیاتی اور صحت کے بحران کی وارننگ دی ہے۔ جہاں ڈھائی لاکھ ٹن سے زائد کچرا مختلف علاقوں میں جمع ہوچکا ہے۔ بلدیہ کے ترجمان عاصم النبیح نے ایک ریکارڈ شدہ بیان میں کہا کہ غزہ شہر اس وقت بدترین صحت اور ماحولیاتی بحران کا شکار ہے، جہاں پانی کی قلت، سیوریج کے اخراج، اور کچرے کے ڈھیروں نے چوہوں اور حشرات کے پھیلاؤ کو بڑھا دیا ہے۔ انہوں نے بتایا کہ بلدیہ کے پاس بحران سے نمٹنے کے لیے ضروری وسائل موجود نہیں، کیونکہ اسرائیلی جنگ کے دوران اس کے پچاسی فیصد سے زیادہ بھاری اور درمیانے درجے کے مشین آلات تباہ ہو چکے ہیں۔ عاصم النبیح کے مطابق بنیادی بلدیاتی خدمات کے لیے ضروری سامان اور آلات کی شدید کمی ہے، جبکہ سیوریج کا پانی گلیوں میں بہنے لگا ہے جس سے ماحولیاتی اور صحت عامہ کا مسئلہ مزید سنگین ہو گیا ہے۔ انہوں نے خبردار کیا کہ اگر حالات ایسے ہی رہے تو وبائی امراض کے پھیلنے کا خدشہ بڑھ جائے گا۔