حرف تہجی میں س اور ش کی طرح شیعہ سنی ساتھ ساتھ ہیں، نگراں وزیر مذہبی امور

کراچی : نگراں وفاقی وزیرِ مذہبی امور انیق احمد نے کہا ہے کہ جنت کے ٹھیکیدار ہم نہیں، یہ اللہ کا معاملہ ہے۔ کراچی میں جامعہ بنوریہ کے طلباء و اساتذہ سے ملاقات کے بعد میڈیا سے گفتگو میں انیق احمد نے کہا کہ نگراں وزیراعظم انوار الحق کاکڑ نے کچھ ہدایات جاری کی ہیں، ان پر عمل کرنا ہے۔ ان کا کہنا ہے کہ حرف تہجی میں س اور ش ساتھ ساتھ ہیں، اسی طرح شیعہ سنی ساتھ ساتھ ہیں، ہمارے معاشرے سے اعتراض ختم ہو جائے تو سب ٹھیک ہو جائے، سختیاں اور منافقت سب کو ختم ہونا چاہیے۔ انہوں نے کہا کہ اگلا الیکشن سازگار ماحول میں ہونا چاہیے، قوم کو مایوسی سے نکالنا ہے، مایوسی کفر ہے۔ ان کا یہ بھی کہنا ہے کہ روڈ ٹو مکہ منصوبے پر کام ہو رہا ہے، حجاج کی بہترین خدمت کرنا چاہتے ہیں۔