Raza Musani 
سری نگر: مقبوضہ کشمیر میں بھارتی فوجیوں کی ریاستی دہشت گردی جاری ہے، ضلع بارہمولہ میں مزید دو کشمیری نوجوانوں کو ایک جعلی مقابلے میں شہید کر دیا گیا۔ فوجیوں نے نوجوانوں شاکر مجید نجار اور حنان احمد کو ضلع کے علاقے کریری میں محاصرے اور تلاشی کی کارروائی کے دوران شہید کیا۔ مقامی لوگوں نے بتایا کہ شوپیاں ضلع سے تعلق رکھنے والے نوجوانوں کو فوجیوں نے ایک فرضی مقابلے میں شہید کیا۔ انسپکٹر جنرل پولیس وجے کمار نے نوجوانوں کے قتل کا جواز فراہم کرنے کے لیے انہیں عسکریت پسند قرار دیا ہے۔ گزشتہ روز سے مقبوضہ علاقے میں شہید ہونے والے نوجوانوں کی تعداد چار ہو گئی ہے۔ بھارتی فوجیوں نے گزشتہ روز ضلع کپواڑہ میں ایسی ہی کارروائی کے دوران دو نوجوانوں کو شہید کر دیا تھا۔ فوجی کارروائی کے دوران عسکریت پسندوں نے بارودی مواد کو دھماکے سے اڑا دیا۔ جس سے دو فوجی ہلاک اور ایک افسر سمیت چار اہلکار زخمی ہوگئے۔
