بحرین اور عمان امارات کے نقش قدم پر،سعودیہ بھی تیار

معاہدہ تاریخی سفارتی پیشرفت قرار ، اسرائیل کو سعودی فضائی حدود استعمال کرنے کی اجازت
ابو ظہبی/تل ابیب (نیوز ڈیسک)عرب امارات نے اسرائیل کے ساتھ اپنے خفیہ تعلقات کو ظاہر کردیا ، عرب امارات کی پیروی کرتے ہوئے عمان ،بحرین اور افریقی ملک سوڈان بھی جلد ہی اسرائیل کو پیارے ہوجائیں گے ،جبکہ سعودی عرب بھی اپنے خفیہ تعلقات کو سامنے لے آئے گا،صیہونی حکومت اور متحدہ عرب امارات کے درمیان تعلقات قائم کرنے کی امریکی صدر ٹرمپ کی کوششوں کے نتیجے میں فریقین نے باہمی تعلقات کی استواری کے معاہدے پر دستخط کردئے، متحدہ عرب امارات اور اسرائیل کے درمیان امن معاہدے کے بعد اب ڈائریکٹ ٹیلیفون سروس کا بھی آغاز کردیا گیا ،امریکا ،عرب امارات اور اسرائیل کے مشترکہ بیان میں معاہدے کو ”تاریخی سفارتی پیشرفت“ قرار دیا گیا ہے، معاہدے کے تحت دونوں ممالک سیکیورٹی ،توانائی ،صحت ،تعلیم سمیت مختلف شعبوں میں تعاون کو فروغ دیں گے، سرمایہ کاری، سکیورٹی، دو طرفہ بنیادوں پر سفارت خانوں کے قیام اور دیگر معاملات سے متعلق معاہدوں پر دستخط کیلئے دونوں ملکوں کے وفود آئندہ ہفتوں میں ملاقات کریں گے ،امریکی صدر ڈونلڈ ٹرمپ نے کہا، یہ معاہدہ مشرق وسطیٰ کو زیادہ پرامن، محفوظ اور خوشحال بنانے کیلئے اہم قدم ہے، اب چونکہ برف پگھل چکی ہے، مجھے توقع ہے کہ مزید عرب اور مسلمان ممالک متحدہ عرب امارت کی پیروی کریں گے، اسرائیل کے وزیر برائے انٹیلی جینس ایلی کوہن نے بتایا کہ عمان اور بحرین سے بھی امارات جیسے معاہدے ہونے والے ہیں ، اس کے علاوہ مسلمان افریقی ممالک سے بھی سفارتی تعلقات کے قیام کے معاہدے ہوجائیں گے ، جن میں سوڈان سرِ فہرست ہے،ادھر اسرائیل کے ٹیلی ویڑن چینل تیرا نے بتایا ہے کہ اسرائیل اور سعودی عرب کے درمیان تعلقات کے قیام کا معاہدہ بحرین اور عمان کے ساتھ سفارتی تعلقات کے قیام سے پہلے عمل میں آئے گا ، سعودی عرب نے متحدہ عرب امارات اور اسرائیل کے درمیان تعلقات کے معاہدے پر خاموشی اختیار کر رکھی ہے تاہم عنقریب اسرائیل کے ساتھ تعلقات قائم کر لے گا، واضح رہے کہ اسرائیل اور متحدہ عرب امارات کے درمیان پروازیں سعودی عرب کے فضائی حدود کو استعمال کرسکیں گی