آرمينيا اور آذربائيجان متنازعہ علاقے نگورنو کاراباخ کے مسئلے کو حل کرنے کے لیے مذاکرات پر رضامند ہوگئے، جو روسی حکومت کی سرپرستی میں ماسکو میں ہوں گے۔ عالمی خبر رساں ادارے کے مطابق آرمینیا اور آذربائیجان کے درمیان مسلح جنگ تاحال جاری ہے، آرمینیا نے 28 فوجیوں کی ہلاکت کا دعویٰ کیا ہے جب کہ آذربائیجان کا کہنا ہے کہ بارود سے بھرے کئی میزائلوں کو وار زون سے باہر ناکارہ بنا دیا ہے تاہم اسی دوران دونوں ممالک نے امن مذاکرات پر رضامندی کا اظہار کیا ہے۔ روسی وزارت خارجہ کی جانب سے جاری بیان میں اس بات کی تصديق کی گئی ہے کہ دونوں ممالک کے سينیئر سفارت کار ماسکو ميں مذاکراتی عمل ميں شريک ہوں گے۔
روسی وزارت داخلہ نے یہ بھی دعویٰ کیا کہ مذاکرات کا یہ عمل روسی صدر ولاديمير پوٹن کی جنگ بندی کی اپيل پر شروع کیا جا رہا ہے۔ واضح رہے کہ پچھلے ماہ کے آخری ایام سے نگورنو کاراباخ کے متنازعہ علاقے ميں آرمينيا اور آذربائيجان کی افواج کے درميان جھڑپوں کا آغاز ہوا تھا جس میں اب تک 400 سے زائد افراد ہلاک ہو چکے ہيں۔
