Raza Musani 
نابلس: صیہونی فوج نے مغربی کنارے کے پناہ گزین کیمپ پر چڑھائی کردی۔ فائرنگ سے دو فلسطینی شہید اور کئی زخمی ہوگئے۔ درجنوں فوجی گاڑیوں پر سوار صیہونی فوج نے صبح سویرے اریحا سے تین کلومیٹر جنوب مغرب میں واقع عقبات جبر مہاجر کیمپ پر دھاوا بول دیا۔ فوجی کیمپ میں واقع کئی گھروں میں گھس گئے۔ عمارتوں کی تلاشی لی اور لوٹ مار کی۔ غاصب فوج کی درندگی کے دوران مزاحمت کار بھی جمع ہوگئے اور مسلح جھڑپیں ہوئیں۔ فائرنگ سے کئی نوجوان زخمی ہوگئے جنہیں اسپتال منتقل کیا گیا۔ جہاں دو نوجوان جان کی بازی ہار گئے۔ جن کی شناخت 16سالہ قصے الولجی اور 25 سالہ محمد ربیہ نجوم القمر کے نام سے ہوئی ہے۔ دونوں نوجوانوں کے جلوس جنازہ میں بڑی تعداد میں فلسطینیوں نے شرکت کی اور صیہونی درندگی کیخلاف نعرے لگائے۔ فوجیوں نے کیمپ سے کئی نوجوانوں کو حراست میں لیکر نامعلوم مقام پر منتقل کردیا۔
