یمن کے متحارب فریقوں میں جنگ بندی میں 2 ماہ کی توسیع پر اتفاق

نیویارک : اقوام متحدہ نے کہا ہے کہ یمن کے متحارب فریقوں نے 2 ماہ کے لیے جنگ بندی کے سمجھوتے میں توسیع کے فیصلے پر اتفاق کرلیا ہے۔ یمن کے لیے اقوام متحدہ کے خصوصی ایلچی ہانس گرنڈبرگ نے ایک بیان میں کہا کہ فریقین کی جانب سے جلد از جلد توسیع شدہ جنگ بندی کے معاہدے تک پہنچنے کے لیے مذاکرات کو تیز کرنے پر بھی اتفاق کیا گیا ہے۔ ہانس گرنڈبرگ اضافی اقدامات کے ساتھ 6 ماہ کی جنگ بندی پر زور دے رہے تھے لیکن دونوں فریقین کو جنگ بندی کے موجودہ معاہدے پر عمل درآمد سے متعلق تحفظات ہیں اور اس حوالے سے بداعتمادی کی گہری جڑیں موجود ہیں۔ یمن تنازع کے سبب ہزاروں افراد ہلاک جبکہ لاکھوں افراد بھوک کا شکار ہیں جس نے سعودی عرب کی زیر قیادت اتحاد کو ایران کے حمایت یافتہ حوثی گروپ کے خلاف کھڑا کر دیا ہے۔ حوثیوں نے سعودی عرب کے زیر قیادت اتحاد پر الزام عائد کیا کہ وہ حوثیوں کے زیر قبضہ حدیدہ اور دارالحکومت صنعا میں ایندھن کی کھیپوں کی متفقہ تعداد کی ترسیل نہیں کر رہا۔