Raza Musani 
نیویارک : متحدہ عرب امارات نے اعلان کیا ہے کہ مغربی کنارے کا الحاق ان کے لیے ایک سرخ لکیر ہے اور ایسی کسی بھی کوشش کو وہ قبول نہیں کریں گے۔ یو اے ای کی نائب وزیر برائے سیاسی امور لانا زکی نسیبہ نے کہا ہے کہ مغربی کنارے کا الحاق فلسطینی ریاست کی خودمختاری اور عالمی اصولوں کی خلاف ورزی ہوگا۔ انہوں نے کہا کہ ان کا ملک غزہ میں جنگ بندی، اسرائیلی محاصرے میں نرمی، اور انسانی امداد کی بلا روک ٹوک فراہمی کے لیے اپنی کوششیں جاری رکھے گا۔ الحاق کا دعویٰ دسیوں ہزار افراد کے بے گھر ہونے کا جواز نہیں بن سکتا۔ صرف فلسطینی ریاست کا قیام ہی اسرائیل فلسطین تنازع کا خاتمہ کر سکتا ہے۔
ادھر مصری وزیر خارجہ بدر عبدالعاطی نے واضح کیا ہےکہ مصر کسی صورت فلسطینی عوام کی نئی نكبہ قبول نہیں کرے گا اور نہ ہی ان کی جبری ہجرت کا دروازہ بنے گا۔ انہوں نے خبردار کیا کہ اسرائیلی جارحیت کے تسلسل سے غزہ اور پورے خطے کی سکیورٹی اور استحکام کو شدید خطرات لاحق ہیں۔
