Raza Musani 
ابوجا: مغربی افریقا کے ممالک نے نائجر میں بغاوت کچلنے اور صدر کی دوبارہ بحالی کیلئے فوجی مداخلت کا منصوبہ بنالیا۔ نائیجیریا کے دارالحکومت ابوجا میں مغربی افریقی ممالک کے سربراہان کا اجلاس ہوا جس میں نائجر میں فوجی مداخلت کی منظوری دے دی۔اکانومک کمیونٹی آف ویسٹ افریقن اسٹیٹس کے کمشنر برائے سیاسی امور عبدالفتاو موسیٰ نے کہا کہ دفاعی سربراہان نے فوجی مداخلت کا منصوبہ تیار کیا ہے تاہم یہ اقدام کب اٹھایا جائے گا اس بارے میں کچھ نہیں بتایا گیا ہے۔ انہوں نے کہا کہ اجلاس میں فوجی مداخلت سے متعلق ہوم ورک کیا ہے۔ تمام ضروری وسائل، کس طرح اور کب فورس تعینات کی جائے گی اس کی بھی منصوبہ بندی کی گئی۔ اکانومک گروپ پہلے ہی نائجر پر پابندی عائد کرچکا ہے اور خبردار کیا ہے کہ اتوار تک صدر بازوم کا اقتدار بحال نہیں کیا تو طاقت کا استعمال کیا جاسکتا ہے۔
