ہندوستان سے امن چاہتے ہیں مگر شرائط پر نہیں، بلاول بھٹو

نیویارک: پاکستانی سفارتی مشن کے سربراہ اور حکومتی اتحادی پیپلزپارٹی کے چیئرمین بلاول بھٹو زرداری نے کہا ہے کہ ہندوستان کے ساتھ امن چاہتے ہیں مگر شرائط پر نہیں۔ نیویارک میں اقوام متحدہ کے ہیڈکوارٹر میں نیوز کانفرنس کرتے ہوئے بلاول بھٹو نے کہا کہ ہندوستان نے بغیر تحقیقات اور ثبوت کے پہلگام واقعہ کا الزام پاکستان پر عائد کیا۔ انہوں نے کہا کہ ہندوستان کے اقدامات خطے کی سلامتی کے لیے خطرے کا باعث بنے۔ خطے میں کشیدگی کی بنیادی وجہ مسئلہ کشمیر کا حل نہ ہونا ہے۔ تنازعہ کشمیر کا کوئی فوجی حل نہیں ہے مذاکرات ہی واحد راستہ ہے۔ بلاول بھٹو نےکہا کہ ہندوستان اسرائیل کی طرح عالمی قوانین کی خلاف ورزی کررہا ہے۔ پانی روکنا بین الاقوامی معاہدوں کی کھلی خلاف ورزی ہے۔ پانی کو بطور ہتھیار استعمال کرنے نہیں دیں گے۔