بھارت میں توہین رسالت پر مسلم دنیا میں شدید احتجاج، بھارتی مصنوعات کے بائیکاٹ کی مہم تیز

دوحہ : بھارت میں برسر اقتدار انتہا پسند ہندو جماعت بی جے پی کے ترجمان کے گستاخانہ بیان پر عالم اسلام میں شدید غم و غصہ کی لہر دوڑ گئی ہے۔ایران اور قطر سمیت مختلف اسلامی ممالک نے بھارت کے سفیروں کو طلب کر کے احتجاجی مراسلہ دیا جبکہ بھارتی اشیا کے بائیکاٹ کی مہم بھی شروع ہوگئی ہے۔قطر نے دوحہ میں بھارتی سفیرکو طلب کرکے بی جے پی ترجمان کے گستاخانہ بیان پر شدید احتجاج ریکارڈ کرایا اور احتجاجی مراسلہ دیا ہے۔ قطری وزارت خارجہ کا کہنا ہے کہ بھارتی حکمران جماعت کے ترجمان کے بیان کی سختی سے مذمت کرتے ہیں۔ ایران کے دارالحکومت تہران میں مقیم بھارتی سفیر کو دفتر خارجہ طلب کیا گیا جہاں انہیں شدید احتجاجی مراسلہ دیا گیا۔ کویت نے بھی بھارت کے سفیر کو دفتر خارجہ طلب کیا اور بھارتی سفیر کو دین اسلام سے متعلق گستاخانہ بیان پر احتجاجی مراسلہ دیا۔ کویتی وزارت خارجہ کا کہنا ہے کہ بھارتی حکمران جماعت کی ترجمان کے بیان کی سختی سے مذمت کرتے ہیں۔ ادھر مصر، سعودی عرب، قطر، بحرین اورکویت میں بائیکاٹ انڈیا کی مہم چل پڑی ہے اور بھارت سے درآمد شدہ اشیا استعمال نہ کرنے کی اپیل کی جارہی ہے جس کی عوام کی جانب سے بھرپور حمایت کی جا رہی ہے۔ عمان کے مفتی اعظم شیخ احمد بن حماد الخلیل نے بھی بھارتی مصنوعات کے بائیکاٹ کا حکم جاری کیا ہے۔ اس سے قبل فروری میں وہ بھارت کو مسلمانوں کے خلاف مظالم پر خبردار بھی کرچکے ہیں۔