Raza Musani 
بغداد :عراقی وزیر اعظم محمد شیاع السوڈانی نے اپنی سرزمین میں لڑاکا طیاروں کی تعیناتی کی امریکی پیشکش کو مسترد کردیا ہے۔ یہ انکشاف عراق میں کوآرڈینیشن فریم ورک الائنس کے ایک ذرائع نے کیا۔ عراقی ذرائع نے نام ظاہر نہ کرنے کی شرط پر بتایا کہ امریکہ نے منصوبے کے تحت کسی بھی بیرونی طاقت کو غزہ میں جاری جنگ میں مداخلت سے روکنے کے لیے عراقی اڈوں پر ایف سولہ طیاروں کی تعیناتی کی درخواست کی تھی۔ جبکہ عراقی افواج کو فضائی دفاعی نظام فراہم کرنے کی بھی پیشکش کی تھی۔ عراقی عہدیدار نے بتایا کہ 2014 میں داعش کے حملے کے وقت عراق نے اپنی افواج کو مسلح کرنے کے لیے مدد مانگی تھی تو امریکہ نے کہا تھا کہ اس عمل میں 24 ماہ لگیں گے۔ آج امریکہ اسرائیل کے لیے فوری طور پر اپنے میزائل کے دفاعی نظام کی تنصیب کر رہا ہے اور ہزاروں فوجی بھی فراہم کر رہا ہے۔
